ဝၚ်ဂကောံသၟတ်မန်လညာတ်တၟိ ဗွဲခမၞောန်
ပ္ဍဲတရဴပေါဲဗတိုက်ဒဳမဵုကရေဇြဳ ကေုာံ အခေါၚ်ဗၠးၜးကောန်ဂကူဂှ် ပါလုပ်ပ္ဍဲပေါဲဗ္တိုက် နကဵုကဏ္ဍသၟတ်မွဲ ပၟိက်ဇၞော်မံၚ်တုဲ ဗဳုသၟတ်ကောန် ဂကူတၞဟ်ဟ်တအ် ချဳဒရာၚ်ပါလုပ်မံၚ်အပ္ဍဲတရဴ ဗၠးၜးဂကူ ဗွဲတၟေၚ် ပ္ဍဲမုက်ချဳဒရာၚ် အကြာဂကူဂမၠိုၚ် ပ္ဍဲဂၠးကဝ်ဂှ် ဂကူမန်ပိုဲလေဝ် ဒးနွံထေက် ရောၚ်ဂးတုဲ နာဲတၠညးကေုာံ နာဲဗညာမန်တအ် ညးၜါတၠ ချပ်စရေၚ်သ္ကအ်ရ။ အခိၚ်ဂှ် ပ္ဍဲသၞာံ ၁၉၉၉ မဒှ်တုဲ နာဲတၠညး ဒးကေတ်မံၚ်တာလျိုၚ် လျိုၚ်ဌာနဆက်ဆောံဝၚ်ကတုဲ နာဲဗညာမန် ဒးကေတ်မံၚ် တာလျိုၚ် ပ္ဍဲဌာနပရေၚ်ပညာ မဒှ်ရ၊ အတိုၚ်လညာတ်နွံဂှ် နာဲတၠညးချပ်စကဵု နာဲအံၚ်မ္ၚဵုတုဲ ညး တအ်တုပ်စိုတ်လ္တူလညာတ်ဏံ သွက်ဂွံဗဒှ် ပတိုန်ဂကောံသၟတ်မွဲတုဲ သဳကၠဳပတိုန်ထ္ၜးကၠုၚ် ကုက္ဍိုပ်သ္ကိုပ်ဗော် ကဆံၚ်ၚ်တအ်ရ၊ ပ္ဍဲသၞာံ ၂၀၀၁ ဂိတု နဝ်ဝေန်ဗာ (၁၈) ဂှ် နူဗော်သ္ပကမကထတုဲ ကၠောန်ကောံဓရဳု သွက်ဂွံပံက် ဂကောံသၟတ် ပ္ဍဲရုၚ်ဆက်ဆောံဝၚ်က ဒၞာဲသ္ၚိဇူဒီုနာဲပြၚ်ဍဳ တအ်ရ၊၊ ပ္ဍဲကောံဓရီုဝွံ ညးစၞးသၟတ် ဒေသ နာနာ ကေုာံက္ဍိုပ်သ္ကိုပ်ဗော်တအ် တိုန်စိုပ်တုဲ နာဲယှိုဲတိၚ် ကေၚ်ကါဗဟဵု ပံက်ကဵုကောံဓရဳု ခုတ်ပ္တိုန်ယၟု “ ဂကောံသၟတ်မန် လညာတ်တၟိ” တုဲလးဖျေံကၠုၚ် အစဳဇန်ကမၠောန်နာနာ တအ်ရ။ ဂၠံၚ်တရဴ ဂကောံဝွံ သ္ဂောံပြံၚ်သၠာဲ ဂကောံမၞိဟ်မန် မၞုံကဵု ဂကောံမၞိဟ်သၠးပွး၊ မၞုံကဵုဗဗွဲဓဝ်၊ မၞုံကဵုၜိုဟ်လလံမွဲမာန်ဂှ် နကဏ္ဍသၟတ်ပံၚ်တောဲကဵု ဂကောံကေၚ်ကာညးဍုၚ်ကွာန်နာနာတုဲ ဗွဲမက္တိုၚ်ကၟိုဟ် ပါလုပ်ချဳဒရာၚ် အာရောၚ်မဒှ်ရ။ ဂလာန်ဒုၚ်ဂိုၚ်ကေတ်ဂကောံဝွံ ပတုဲဖဵုသွက်ဂကောံမၞိဟ်မန် နကဵုဇြဟတ်သၟတ် မဒှ်ရ။
လညာတ်ဂမြၚ်ဂကောံ
လညာတ်ဂမြၚ်ဂကောံသၟတ်မန်လညာတ်တၟိဝွံ သ္ဂောံကလိဂွံဓဝ်ၜိုဟ်လလံ ကေုာံ အခေါၚ်တုပ်သၟဟ် မၞုံကဵုဗဗွဲဓဝ် ဗွဲမသၠးပွး အပ္ဍဲဂကောံမၞိဟ်ပိုဲ မဒှ်ရ။ ဂၠံၚ်တရဴကမၠောန်ဂကောံ သၟတ်မန်လညာတ်တၟိဝွံ သ္ပသ္ဇိုၚ်ကု ဇြဟတ်သၟတ်မန်တုဲ ပ္ဍဲဂကောံမၞိဟ်ပိုဲ သ္ဂောံကလိဂွံ အခေါၚ်တုပ်သၟဟ်၊ ဓဝ်ၜိုဟ်လလံ၊ မၞုံကဵုအခေါၚ်သၠးပွးဂှ် ဒက်ပခိုၚ်ဂကောံမှာဇန်နာနာတုဲ ပံၚ်တောဲကၠောန်အာရောၚ်။
တၚ်ရန်တၟအ်ဂကောံ
- ၁။ သ္ဂောံဒှ်အထံက်အပၚ်ကဵု ပရေၚ်ချဳဒရာၚ် ဒဳမဝ်ကရေသဳ ကေုာံ ဗၠးၜးဂကူ၊
- ၂။ သ္ဂောံလွဳၜံၚ်ပတိတ် က္ဍိုပ်သ္ကိုပ်အနာဂတ် ကေုာံ ဒြဟတ်ပရေၚ်ဍုၚ်ကွာန်အရန်မွဲ၊
- ၃။ သ္ဂောံဒက်ပခိုၚ်ကဵုဒြဟတ် ဂကောံညးဍုၚ်ကွာန်ဂမၠိုၚ်၊
- ၄။ သ္ဂောံဒက်ပတန် ဓဝ်ညဳသာ အကြာသၟတ်ဂမၠိုၚ်၊
- ၅။ သ္ဂောံထိၚ်ဒဝ်ဇၞော်မောဝ်တိုန် လိက်ပတ်ယေန်သၞာၚ်မန်၊